မိမိတို့ဘ၀ကို အသက်အရွယ်အလိုက် နောက်ပြန်ကြည့်ကြည့်၊ ရှေ့ကျော်ကြည့်ကြည့်၊ ဘေးဘီဝဲယာကို ကြည့်ကြည့် စိတ်ညစ်စရာတွေ တွေ့နေပါသလား၊ မကျေနပ်စရာတွေ တွေ့နေပါသလား။ ၀မ်းနည်း သွားပါသလား။ စိတ်ကို ပြန်စုစည်းလိုက်ပါ၊ ကိုယ်တစ်ယောက်တည်း မဟုတ်ဘူး။ ကိုယ့်ဘေးဘီဝဲယာမှာ ကိုယ့်လိုသူတွေ အများကြီး၊ ကိုယ့်အောက်မှာ ကိုယ့်လိုတောင်မဟုတ်တဲ့ ကိုယ့်ထက်နိမ့်တဲ့လူတွေ အများကြီး၊ ပျော်အောင်နေလိုက်ပါ။
ပျော်စရာနည်းလမ်းများ
ပျော်အောင်နေမှ ပျော်တာပါ၊ စိတ်ညစ်ရင် မပျော်ပါဘူး။ ကိုယ်ကြိုက်တာ ကိုယ်လုပ်ရရင် ပျော်တာပါပဲ။ စိတ်ချမ်းသာတာပါပဲ။ ကိုယ်ဝါသနာပါတာ ကိုယ်လုပ်ပါ၊ ပညာရေးက စရရင် ကိုယ်ဝါသနာပါတာ ကိုယ်ကြိုက်တာ ကိုယ်သင်ယူပါ။ ကစားခုန်စားမှာ ကိုယ်ကြိုက်နှစ်သက်တဲ့ အားကစားကိုယ်ကစားပါ။ အစားမှာ ကိုယ်ကြိုက်တဲ့အစား ကိုယ်စားပါ။ အဲဒါဆိုရင် ပျော်စရာကောင်းပါတယ်။
ကိုယ်ခင်မင်တဲ့မိတ်ဆွေတွေနဲ့ ပေါင်းသင်းပါ။ သူတို့နဲ့ မျှဝေခံစားပါ။ မိသားစုနဲ့ မျှဝေပါ။ ချစ်ခင်သူနဲ့အတူ ခံစားပါ။
မပျော်အောင်နေကြသူများ
တချို့ကတော့ ပျော်အောင်နေနည်း သိပါရက်နဲ့ မပျော်အောင်နေတတ်ကြတယ်။ ကိုယ်ကိုယ်တိုင်လည်း မပျော်ဘူး၊ ပျော်အောင်လည်း မနေဘူး။ သူများတွေပျော်နေကြတာ၊ ပျော်အောင်နေတာကိုလည်း မကြိုက်ဘူး။
အဲဒီလူတွေက ပျော်တာဟာ အချည်းနှီးပဲ။ သက်သက်မယ့် အချိန်၊ စွမ်းအင်ဖြုန်းတီးနေကြတာပဲလို့ ယူဆကြတယ်။
တချို့က ပညာအတွက်၊ တချို့က ဥစ္စာအတွက်၊ တချို့က ရာထူးအာဏာအတွက် မက်မက်မောမော ရှာဖွေဖမ်းဆုပ်နေကြတယ်။ မပျော်ကြဘူး၊ မပျော်နိုင်ကြဘူး။
ပညာကို ပျော်တာထက် ပိုမြတ်နိုးတယ်။ ငွေကြေးကို အပျော်ထက် ပိုမက်တယ်။ အာဏာကို ပျော်တာထက် ပိုတမ်းတတယ်။ သူတို့လိုချင်ရာနောက်ကိုပဲ လိုက်နေတဲ့သူတွေဟာ အပျော်ကိုအလို မရှိကြဘူး။ မပျော်လည်းဘဲ နေကြ တယ်။ မပျော်ဘဲ နေနိုင်ကြတယ်။ နောက်တော့ ပျော်တာပေါ့လို့ သူ တို့စိတ်ထဲတွေးကြတယ်။ ဒါပေမယ့် အဲဒီနောက်တော့ကို သူတို့ သေသာသွားရော မရောက်ခဲ့ကြဘူး။ မပျော်ခဲ့ကြဘူး။
ဘ၀ဆိုတာဘာလဲ
တကယ်တော့ ဘ၀တစ်ခုဆိုတာ မွေးဖွားပြီးနောက်နဲ့ မသေဆုံးမီ ကြားကာလတစ်ခုပါပဲ။ တချို့ကတော့ အဲဒီအပိုင်းအခြားလေးကို နာရီပိုင်းပဲ ရကြတယ်။ တချို့ကတော့ ရက်ပိုင်းရကြတယ်။ တချို့က လပိုင်းရကြတယ်။ တချို့က ၁၀ နှစ်၊ အနှစ် ၂၀ စသဖြင့်ရတယ်။ တချို့က အနှစ် ၃၀ ရတယ်။ တချို့ က အနှစ် ၄၀ ရတယ်။ တချို့က တော့ သက်တမ်းလွန် ၈၀၊ ၉၀ အ ထိတောင် ရကြတယ်။
ရတဲ့ဘ၀ကိုလည်း အမျိုးမျိုး တည်ဆောက်ကြပြန်တယ်။ တချို့က ပညာအခြေပြုတယ်။ တချို့က စီးပွားရှာဖွေမှုမှာ အခြေပြုတယ်။ တချို့က ကျော်ကြားမှု၊ ဂုဏ်သတင်းကြီးမားမှုဘက် လိုက်တယ်။ တချို့က ရာထူး၊ အာဏာကြိုက်တယ်။ တချို့ကတော့ ဘာသာအယူဝါဒမှာ စွဲကပ်ခိုနားတယ်။ ဘ၀တစ်ခုအပေါ် မိမိတို့နားလည်သလို၊ ခံစားသလို၊ တပ်မက်သလို ဘ၀အဓိပ္ပာယ်တွေ ဖွင့်ဆိုကြတယ်။
ကံပြုသမျှ
ပျော်ရွှင်မှု၊ ဘ၀နဲ့ ဘ၀အဓိပ္ပာယ်အကြောင်းတွေ ပြောကြရင် ကံဆိုတာကို ဖယ်ထားလို့ မရပြန်ဘူး။ တချို့က ကံကိုမယုံဘူး၊ ကံဆိုတာ အလုပ်ပဲလို့ တချို့က အဓိပ္ပာယ်ဖွင့်ဆိုကြတယ်။ ကံဆိုတာမရှိဘူးလို့ ဆိုသူကလည်း အခိုင်အမာဆိုကြတယ်။ ဗုဒ္ဓဘာသာဝင်ဆိုရင်တော့ ကံကိုယုံကြည်ရမှာပဲဖြစ်တယ်။ လူတစ်ယောက်ရဲ့ဘ၀မှာ ကံရဲ့ ပြဋ္ဌာန်းမှုတွေကလည်း ရှိနေတတ်တယ်။
လူတစ်ဦးတည်းရဲ့လက်ချောင်းတွေအရှည်၊ အတိုမညီသလိုဘဲ၊ မိဘနှစ်ပါးကမွေးတာချင်းတူပါရက် ကံအကျိုးပေးကွာခြားတတ်တယ်။ တိုက်ပွဲတွေ အတူတူတိုက်ခဲ့ပ်ါရက် တိုက်ပွဲဝင်တိုင်း ဗိုလ်ချုပ်မဖြစ်ကြဘူး။ ယောက်ျားသားတို့အတွက် ခံစားမှုအာရုံပိုင်းဆိုင်ရာဝန်ဆောင်မှု ပေးသူချင်းအတူတူ ခံစားခွင့်ရတဲ့ အခကြေးငွေခြင်း မတူကြဘူး။တချို့ကံကောင်းတယ်။ တချို့က ကံမကောင်းဘူး။
ကံကိုမစီရင်နိုင်သေးသမျှ ကံပြုသမျှနုရမှာပါပဲ။ ကံဆိုတာလည်း တကယ်တော့ ကိုယ်ပြုသမျှ ကောင်းမှု၊ မကောင်းမှုရဲ့ အကျိုးဆက်ပါပဲ။ ကောင်းတာလုပ်ရင် ကောင်းကံဖြစ်မယ်၊ မကောင်းတာလုပ်ရင် မကောင်းကံဖြစ်တယ်။ ကောင်းတာလုပ်ပါရက်ကယ်နဲ့ မကောင်းတာဖြစ်တာ၊ မကောင်းတာတွေ လုပ်နေပါရက်နဲ့ ကံကောင်းနေသေးတာတွေဟာလည်း ကံပဲ မဟုတ်လား။ ကံကောင်းနေတုန်းတော့ ဘာမှလုပ်လို့မရဘူး။ ကံမကောင်းတော့ဘူးဆိုလည်း ဘာမှလုပ်လို့ မရတော့ဘူးပေပဲ။
ပျော်အောင်နေလိုက်ပါ
ဘ၀ကို သရုပ်ခွဲကြည့်တဲ့အခါ အသက်ရှင်ခြင်း၊ ရုန်းကန်လှုပ်ရှားခြင်းနဲ့ ခံစားခြင်းဆိုတဲ့ အပိုင်းသုံးပိုင်းကို တွေ့နိုင်ပါတယ်။ တိရစ္ဆာန်တွေထက် မြင့်တဲ့အပိုင်းကတော့ ခံစားခြင်းပါပဲ။ အသက်ရှင်ခြင်းနဲ့ အသက်ရှင်ဖို့ ရုန်းကန်လှုပ်ရှားခြင်းကတော့ လူဖြစ်ဖြစ်၊ တိရစ္ဆာန်ဖြစ်ဖြစ် အတူတူပါပဲ။ ကိုယ်ရှင်သန်အောင် နည်းမျိုးစုံနဲ့ ကြိုးစားရတာပါပဲ။ ဒီမှာ တရားနည်းလမ်း ကျချင်ကျ မယ်၊ တရားနည်းလမ်းမဲ့ချင်လည်း မဲ့မယ်။ မတတ်နိုင်ဘူး၊ ရှင်သန်ရေး ကို ဦးစားပေးကြရတာပဲ။ လူကတော့ တရားမဲ့မဖြစ်အောင် ထိန်းသိမ်းဆင်ခြင်ကြရတယ်။
သတိထားရမှာက ခံစားတဲ့အပိုင်းပဲ၊ တိရစ္ဆာန်မှာလည်း ခံစားမှုတချို့ရှိတယ်။ ဥပမာ နာကျင်တာ၊ နွားတွေ၊ မြင်းတွေ၊ ခွေးတွေကို ရိုက်ရင် နာတယ်၊ အော်တယ်၊ ပြေးတယ်။ ဥပမာ သဘောကျတာ၊ ကြောင်တွေ၊ ခွေးတွေကို ပွတ်သပ်ချော့မြူရင် သဘောကျတယ်၊ မြူးနေတယ်၊ တခြားဟာတွေလည်း ရှိဦးမှာပဲ၊ နွားတွေက သူတို့ကိုသတ်မှာ သိတယ်၊ ငိုကြတယ်။ ၀က်တွေကတော့ အော်တာပဲ။
လူကတော့ ခံစားမှုမှာ အများကြီးသာသွားပြီ၊ အာရုံခြောက်ပါးလုံးနဲ့ အပြည့်ခံစားတယ်။ ခံစားမှု အာရုံတွေကလည်း အရမ်းကောင်းကြတယ်၊ ရိုးကနဲ၊ ရိပ်ကနဲတောင် ဖမ်းပြီး ခံစားနိုင်ကြတယ်။ သူများ ခံစားမှုကိုလည်း ကူးစက်ခံစားနိုင်ကြတယ်။ သူများနေရာ ကိုယ်ဝင်ပြီးလည်း ခံစားတတ်ကြတယ်။ နည်းမျိုးစုံနဲ့ကို ခံစားကြတယ်။ ဒုက္ခ၊ သုခ၊ အပူ၊ အအေး၊ အပျော့၊ အမာ၊ အထူး၊ အပါး အစုံအလင် ခုံခုံမင်မင်ခံစားနိုင်တာ လူသတ္တ၀ါ တစ်မျိုးပဲ ရှိတယ်။
သိပ်ခံစားတတ်တဲ့ သတ္တ၀ါဖြစ်တာမို့ လူတွေဟာ ပျော်ပျော် မနေတတ်တော့ဘူး။ မပျော်တော့ဘူး၊ လိုက်ပြီးခံစားနေကြတယ်။ ဒေါသတွေထွက်ကြတယ်၊ ၀မ်းနည်းကြတယ်။ ကြိတ်ပြီးဆဲရေးတယ်။ အံကြိတ် တက်ခေါက်တယ်။
တကယ်တော့ လူတွေက ခံစားလွန်းအားကြီးတဲ့အခါ မေ့သွားတာတစ်ခုရှိတယ်။ ဒီလိုပဲ အမြဲခံစားနေရမှာပဲလို့ ထင်တယ်။ တကယ်တော့ မြဲတာဘာမှမရှိပါဘူး။ မမြဲခြင်းတရားဟာ မြဲတယ်လို့ဆိုကြပါတယ်။
မိမိတို့ အသက်အရွယ်အလိုက် နောက်ကိုပဲ ပြန်ကြည့်ကြည့်၊ ရှေ့ကိုပဲ ကျော်ကြည့်ကြည့်၊ ဘေးဘီကိုပဲ ကြည့်ကြည့် အလွယ်တကူ တွေ့ရမှာက မမြဲဘူးဆိုတာကိုပါပဲ။ သိပ်ကြီးလည်း မခံစားပါနဲ့၊ ချိတ် ပြီး(သူတစ်ပါးခံစားမှု ကိုယ့်ခံစားမှုလုပ်ပစ်တာ) လည်း မခံစားပါနဲ့။
သိပ်ကြီးခံစားရတော့ ကိုယ်ပဲ ခံစားရတာ၊ တစ်ဖက်ကကျတော့ ကိုယ်နဲ့လိုက်ပြီး မခံစားနေဘူး။ ချိတ်ပြီး ခံစားတော့ စာနာမှုတော့ ပေးနိုင်ပါရဲ့၊ ခဏနေရင်သူတို့က (မူလခံစားသူ) ကောင်းသွားမှာ၊ ကိုယ်က ဆက်ခံစားနေရမှာ ဖြစ် တယ်။
ဒါကြောင့် ခံစားမှုတွေလျှော့ပြီး ပျော်အောင်နေတတ်ဖို့ လိုတယ်။ ပျော်အောင်နေဖို့ကတော့ အထက်မှာ ဆိုခဲ့သလို ကိုယ်ပြောချင်တာလေး ကိုယ့်မိတ်ဆွေတွေနဲ့ ပြော၊ ကိုယ်လုပ်ချင်တာလေး ရှာဖွေလုပ်ကိုင်၊ ကိုယ်စားချင်တာလေး ရှာဖွေစားသောက်ပါ။
ဘ၀တိုတိုလေးကို မသေအောင်ရှင်သန်ပြီး ပျော်အောင်ခံစားကြည့်ပါ။ အများကြီးသက်သာသွားပါလိမ့်မယ်။ အပူတွေ၊ ဒုက္ခတွေ၊ စိတ်ဆင်းရဲစေမယ့်အရာတွေကို သိပ်ကြီး မခံစားပါနဲ့။ ပျော်အောင်နေလိုက်ပါ။
