စပိ၊ တမ်ပိုနှင့် စဉ်းစားစရာလေးတွေ

အောင်မြင်မှု၊ ကျော်ကြားမှု၊ ငွေကြေးနဲ့ အခွင့်အရေးတွေကို အလကားမရတတ်ပါဘူး။ လူကြီး၊ မိဘ၊ ဆရာသမားကြောင့်ရတာဆိုလည်း ကိုယ့်မှာထိုက်သင့်တဲ့ အရည်အချင်းမရှိရင် ခဏပဲဖြစ်ပါလိမ့်မယ်။ တကယ်ကြာရှည်စွာနဲ့ မပြတ်တမ်းရဖို့ကတော့ ကိုယ်တိုင်ကြိုးစားမှပဲရပါတယ်။

ဝန်ထမ်းအတွက်ဆို လစတိုးဖို့၊ အခွင့်အရေးရဖို့၊ နိုင်ငံခြားသွားရဖို့ဆိုတာတွေဟာ ကံကောင်းလို့ဆိုတာအပြင် အများတကာထက်ပိုကြိုးစားထားလို့၊ အပင်ပန်းခံထားလို့၊ အတွေ့အကြုံပြည့်ဝလို့ ဆိုတာတွေလည်းပါဝင်ပါတယ်။ တကယ်တမ်းကတော့ ကြိုးစားမှုက အခြေခံပါပဲ။

အနောက်နိုင်ငံတွေ တိုးတက်ဖွံ့ဖြိုးနေတာ၊ အဲဒီကလူတွေကိုကြည့်ရင် အပြေးအလွှားရှင်သန်နေတာကို တွေ့ရပါတယ်။ အနောက်က ယဉ်ကျေးမှုနဲ့ အဲဒီပတ်ဝန်းကျင်ကို သူတို့ရဲ့ရုပ်ရှင်တွေ၊ ဂီတတွေ၊ ရုပ်မြင်သံကြားသတင်းနဲ့ တင်ဆက်ထုတ်လွှင့်တဲအစီအစဉ်တွေ၊ ပညာရပ်ဆိုင်ရာစာအုပ်စာတမ်းနဲ့ ပုံမှန်ထုတ်ဝေနေတဲ့ စာအုပ်စာတမ်းစာစောင်တွေကနေ လေ့လာသူတိုင်းသိရှိပြီးဖြစ်ပါတယ်။

ကျွန်တော်ကတော့ အဲဒီဝန်းကျင်ကို မကြာမီရက်ပိုင်းက ရောက်ခဲ့ပါတယ်။ အမေရိကကို ၁၀ ရက်လောက်ရောက်ခဲ့တာပါ။ ၀ါရှင်တန်ဒီစီ၊ ဆီယက်တဲလ်နဲ့ ဟိုနိုလူလူဆိုတဲ့ မြို့ကြီးတွေကို ရောက်ခဲ့ပြီး အဲဒီက အစိုးရ၊ အစိုးရမဟုတ်တဲ့အဖွဲ့အစည်းနဲ့ စီးပွားရေးအဖွဲ့အစည်းတွေက လူတွေနဲ့တွေ့ခဲ့၊ စကားပြောခဲ့၊ အင်တာဗျူးခဲ့ရပါတယ်။ သူတို့ရဲ့နေပုံထိုင်ပုံ၊ ပြုမူလှုပ်ရှားပုံ၊ စကားပြောပုံ၊ တုံ့ပြန်လှုပ်ရှားပုံတွေကို တွေ့ရတဲ့အခါ ကျွန်တော်တို့စဉ်းစားစရာလေး တွေရခဲ့ပါတယ်။

စပိ
Speed(စပိ)ကို အမြန်၊ အမြန်နှုန်းလို့ဘာသာပြန်ရမှာဖြစ်ပေမယ့် စပိလို့ပဲရေးလိုက်ပါတော့တယ်။ အနောက်နိုင်ငံတွေ ဖွံ့ဖြိုးတိုးတက်နေတာ ဒီနေ့လုပ်လို့ ဒီနေ့ဖြစ်တာ မဟုတ်ပါဘူး။ နှစ်ပေါင်းများစွာ လုပ်ကိုင်ခဲ့ကြလို့ ဒီနေ့အခြေအနေရောက်လာတယ်ဆိုတာ စဉ်းစား တတ်သူတိုင်းသိပါတယ်။

ဒီနေ့အခြေအနေမှာတော့ သူတို့ရဲ့အခြေခံအဆောက်အဦတွေ ဖွံ့ဖြိုးတိုးတက်ပြီးဖြစ်လို့ စွမ်းဆောင်ရည်ရှိတိုင်း လုပ်နိုင်ကိုင်နိုင်တဲ့၊ ခံစားနိုင်တဲ့ အခြေအနေရှိနေကြပြီမို့ စပိ သိပ်ကောင်းပါတယ်။

စပိကို အင်္ဂလိပ်ဘောလုံးပွဲတွေနဲ့လည်း ယှဉ်တွဲလေ့လာနိုင်ပါတယ်။ အင်္ဂလိပ်ဘောလုံးပွဲတွေက စပိကို အားပြုကစားပါတယ်။ တချို့ဘောလုံးအားကစား ဝေဖန်သူတွေကတောင် ကန်တင်ပြေးလုကန်ဆိုတာ အင်္ဂလိပ်ဘောလုံးကစားနည်းပဲလို့ဆိုကြပါတယ်။ တောင်အမေရိကနိုင်ငံအသင်းတွေလို ဘောလုံးရသအပြည့်အ၀မပေးနိုင်ဘူးလို့ဆိုကြပါတယ်။ စပိကြိုက်တဲ့သူတွေကတော့ အင်္ဂလိပ်ဘောလုံးပွဲကို ကြိုက်ကြပါတယ်။

အမှန်တော့ အချိန်ယူတာ၊ စိတ်ရှည်တာ၊ သပ်သပ်ရပ်ရပ်နဲ့ ကောင်းအောင်လုပ်နိုင်တာက ကောင်းပါတယ်။ ဒါပေမယ့် ဒီနေ့အမြန်ကမ္ဘာမှာကျတော့ ကောင်းပေမယ့် အချိန်သိပ်ကြာနေရင် တကယ်မကောင်းတော့ပါဘူး။ စပိဆိုတဲ့ နေရာမှာ အမြန်နှုန်းတစ်ခုတည်းမဟုတ်ဘူး။ အရည်အသွေးလည်း ပါပါတယ်။ မှန်ကန်မှုလည်း ပါပါတယ်။ တိကျသပ်ရပ်မှုလည်း ပါပါတယ်။ ဒါကြောင့် စပိကို အမြန်လို့ ဘာသာမပြန်လိုက်တာပါ။

မြန်တော့မြန်ပါရဲ့ လွဲနေမယ်။ မှားနေမယ်၊ မသပ်ရပ်ဘူး၊ မတိကျဘူး၊ နောက်ကလိုက်လုပ်ရတယ်၊ ပြန်ပြင်ရတယ်၊ ပြန်တောင်းပန်ရတယ်၊ အရည်အသွေးမကောင်းဘူးဆိုရင် စပိမဟုတ်ပါဘူး။ ကျွန်တော် တို့သတင်းစာသမားတွေအတွက်ဆိုရင် စပိကပိုအရေးကြီးပါတယ်။ စပိမကောင်းရင် အလုပ်မဖြစ်တော့ပါဘူး။ ဒီကနေ့လုပ်ကိုင်နေတဲ့ သတင်းဂျာနယ်(အပတ်စဉ်ထုတ်)ကနေ သတင်းစာ(နေ့စဉ်ထုတ်)ကို သွားမယ်၊ ပြောင်းလဲလုပ်ကိုင်ကြမယ်ဆိုရင် စပိကအရေးအကြီးဆုံးပါပဲ။

အမေရိကမှာ စပိကို တွေ့ခဲ့ပါတယ်။ နေရာတော်တော်များများမှာ တွေ့ခဲ့တာပါ။ တချို့က စက်ရုပ်ဆန်တယ်လို့ဆိုကြပေမယ့် လူတစ်ဦးချင်းတိုးတက်ဖို့၊ မိသားစုတစ်ခုတိုးတက်ဖို့၊ ကိုယ်ပါဝင် ဆောင်ရွက်နေတဲ့ အဖွဲ့အစည်းတိုးတက်ဖို့၊ ကိုယ့်ပတ်ဝန်းကျင်တိုးတက်ဖို့၊ နိုင်ငံတိုးတက်ဖို့ဆိုရင်တော့ စပိကို ကျွန်တော်တို့ ထည့်သွင်းစဉ်းစားရမှာဖြစ်ပါတယ်။
ကြိုးစားသူအတွက် အသက်မထွက်မီအထိ အလုပ်လုပ်ကိုင်ရမည့်ကာလအတန်ကြာအမြန်ကမ္ဘာတွင် ပညာနှင့် ကျွမ်းကျင်မှုကိုအသုံးပြု၍ သပ်ရပ်စိတ်ချရသောအလုပ်များလုပ်နိုင်သည့် စပိဖြစ်ရန်လည်း အရေးကြီးသည်။

တမ်ပို
စပိလိုပဲ နောက်စာလုံးတစ်လုံး အကြောင်းပြောချင်ပါတယ်။ အဲဒါကတော့ တမ်ပို(Tempo)ပါပဲ။ တမ်ပိုကို ဘာသာပြန်ရရင် အမြန်နှုန်းလို့ပဲ ယေဘုယျဘာသာပြန်ရပါမယ်။ ဒါပေမယ့် တကယ့်အဓိပ္ပါယ် ကတော့ပုံမှန်လုပ်ကိုင်နေတဲ့နှုန်းကနေ လိုအပ်လာရင် ဒါမှမဟုတ် ပိုထိရောက်တဲ့အခြေအနေတစ်ရပ် ရောက်ဖို့၊ ပီပြင်ဖို့အတွက်ကို တင်လိုက်ရတဲ့နှုန်း(အမြန်နှုန်း)ဖြစ်ပါတယ်။ အဲဒါကြောင့် ဘာသာမပြန်တော့ဘဲ တမ်ပိုလို့ပဲရေးပါမယ်။

တမ်ပိုကို ကျွန်တော်တို့ သိကြတာက ဝေ့ါဇ်(Waltz)ဂီတမှာပါ။ ခံစားမှုတစ်ခုကို ပေးနိုင်အောင် တင်တီးတဲ့အမြန်ပေါ့။ တမ်ပိုတီး လိုက်တာပေ့ါ။ ပုံမှန်ဆိုရင်တော့ စုံတွဲတွေကလို့ရအောင် နူးညံ့ချို သာလေးတီးတာပေါ့။ နောက်တော့ ခံစားမှုတက်လာအောင် အမြန်တီးတာပေါ့၊ လိုအပ်သလို မြန်အောင် တီးလိုက်တော့လည်း ခံစားလို့ကောင်းတာပါပဲ။

နောက်တစ်ခုက ရုပ်ရှင်ကားတွေမှာ၊ ၀တ္ထုဇာတ်လမ်းတွေမှာ အထွတ်အထိပ်ခံစားမှုရအောင် (မျက်ရည်ကျအောင်) တမ်ပိုကို ဆွဲတင်ပစ်လိုက်တာပါပဲ။ ပုံမှန်ဇာတ်လမ်းအခင်းအကျင်းကနေ ဇာတ်ထိပ် ဇာတ်ထွတ်ကို ပို့ပေးလိုက်တာပဲ။ လိုအပ်ရင် လိုအပ်သလို အချိန်ကိုက်၊ အရည်အသွေးအပြည့်၊ ကြာမြင့်ချိန်အတိအကျ၊ ခံစားမှုအံဝင်ခွင်ကျမြှင့်ပေးလိုက်တာကို တမ်ပိုမြှင့်တယ်၊ တမ်ပိုတင်တယ်လို့ ခေါ်ကြတာပါပဲ။

အဲဒီတမ်ပိုက သူတို့ဆီမှာ သိပ်ကောင်းနေပြီ။ လိုရင်လိုအပ်သလိုတင်လို့ရနေတယ်။ ဘောလုံးသမားတွေကိုပဲ ပြန်ပြီးဥပမာပေးရမယ်။ ဥရောပတစ်ခွင်ကကမ္ဘာကျော်ကလပ်အသင်းကြီးတွေမှာ ကစားနေကြတဲ့ ကမ္ဘာကျော်ဘောလုံးသမားတွေရဲ့ စပိက ကောင်းသလို ကစားပွဲရဲ့ တမ်ပိုကိုလည်း လိုရင် ရောက်အောင်ကစားနိုင်တယ်။ ရှင်းရှင်းပြောရရင်တော့ ညှစ်အားပေ့ါ။ တမ်ပိုဆိုတာ အမြင့် ဆုံးကိုရောက်အောင်ညှစ်ထုတ်ပစ်လိုက်တာပေါ့။

တမ်ပိုက ကစားပွဲတစ်ခုမှာပဲဖြစ်ဖြစ်၊ လုပ်ငန်းဆောင်ရွက်မှုတစ်ခုမှာပဲဖြစ်ဖြစ်၊ အများကြီးမရှိနိုင်ဘူး။ ခဏခဏမဖြစ်နိုင်ဘူး။ တစ်ခါပဲရှိချင်ရှိမယ်။ နှစ်ခါလောက်ရှိချင်ရှိမယ်။ ဒါပေမယ့် ရင်သပ်ရှုမောနဲ့ အကောင်းဆုံး ခံစားနိုင်စွမ်းရှိရမယ်။

အဲဒီတမ်ပိုကိုရအောင် ကျွန်တော်တို့ပြင်ဆင်ထားရမယ်။ ဒါတွေက လူတစ်ဦးချင်းလုပ်လို့ရတဲ့ဟာတွေပဲ။ လူတစ်ဦးချင်းကနေ တစ်နိုင်ငံလုံးလုပ်ထားနိုင်ရင် ပိုကောင်းတာပေ့ါ။ ခုနကပြောခဲ့တဲ့ စပိတွေ၊ တမ်ပိုတွေရနိုင်ဖို့ကတော့ ပညာရည်ကို တတ်နိုင်သရွေ့ မြှင့်ထားရမယ်။ အတွေ့အကြုံကို ရသမျှရှာယူနေရမယ်။ ဗဟုသုတတွေတိုးပွားအောင် လုပ်ထားရမယ်။

မြန်မာတွေမှာ အစွမ်းရှိတယ်။ အတုခိုးတာ၊ အတတ်သင်တာမြန်တယ်။ ပတ်ဝန်းကျင်ပဲ၊ ရေခံမြေခံပဲ။ ပတ်ဝန်းကျင်ကောင်းရင်၊ ရေခံမြေခံကောင်းရင် သူတို့လိုပဲ စပိတွေ၊ တမ်ပိုတွေရှိနေမှာပဲ၊ အဲဒါဆိုအောင်မြင်မှာပဲ၊ ကြိုးစားကြဖို့ပါပဲ၊ စဉ်းစားကြည့်ဖို့ပါ။
(ဆောင်းပါးနှင့်ပတ်သက်၍ ဝေဖန်ဆွေးနွေးလိုပါက myothahtet@ gmail.com သို့ ရေးပါ၊ ပြောပါ။)