ခေါ်သံနီးတဲ့နေ့

စားဝတ်နေ ထိုအကြောင်းတွေနဲ့
ပိုကောင်းအောင် ဘယ်လိုပြုပေမယ့်
အိုမှုက မညှာတာ
ဗျာဓိပါ အဖော်တွဲလို့
ဆွဲခေါ်ခဲ့ပါ။

အို နာ တွေ
ကိုယ်မှာလေ ခါခါဖိသော်လည်း
သိလျက် မရုန်းသာ
မုန်းစရာ ရုပ်နာမ်စု
ညွှန်းပြုခန္ဓာ။

ဤခန္ဓာ
စီမံကာ ပြုသမျှ
နုကြရ နတ်ဗြဟ္မာ
သတ္တ၀ါ မဆန်ငြင်းနိုင်ဘူး
အံတင်းလို့ ကြိတ်မှိတ်ကာ
နှိပ်စက်တာ လွန်ပြင်း။

မွေးနေ့ခါ
ထွေးပွေ့ကာ အကြိမ်များသလောက်
တံခါးခေါက် လှမ်းခေါ်သံ
နားလျှံ ဘယ်အကြိမ်ရောက်မှာ
ခေါ်သံနောက် ခရီးနှင်
မသွားချင် နေမရတာမို့
ကြုံကြရ ဘ၀တို
ခဏဆို ဒီကာလမှာ
ကွယ် ကောင်းကြစိတ်ရင်း...။

ဝေမိုး-ကျွန်းလှ
အသက် ၄၀ ပြည့်မွေးနေ့
အမှတ်တရ

ဆရာတော်ဝေမိုးကျွန်းလှမှာ မိမိအပေါ်ကောင်းခဲ့သည်၊ မိမိငယ်စဉ် စာရေးသက်နုစဉ် ဘာသာပြန်ဘ၀က မိမိစာများကို ယုံယုံကြည်ကြည်သုံးကာ စာမူခကိုလည်း မိမိတောင်းသလောက်ပေးခဲ့သည်သာဖြစ်သည်။ မိမိစိတ်ဓါတ်ကို မြှင့်တင်ပေးခဲ့သည်။ ဆရာတော်မွေးနေ့တွင် ဆရာတော်အား ဦးခိုက်ကာ ဆရာတော်မွေးနေ့ ဖိတ်စာတွင် ရေးသားထားသော မွေးနေ့အမှတ်တရကဗျာကို ဖော်ပြပါသည်။ လာမည့်လသည်လည်း မိမိမွေးလဖြစ်သောကြောင့် ဆရာတော့်ကဗျာလေးကို ကောင်းစွာခံစားနားလည် နှစ်ခြိုက်မိပါသည်။ ဆရာတော်မွေးနေ့မှာ သြဂုတ် ၂ ရက်ဖြစ်သည်။ ၂၀၀၇ တွင် သက်တော် ၄၀ ပြည့်သည်။